GEO
ENG

media center

MEDIA CENTRE

more
11 November, 2022

პოსტკოვიდური პნევმონია და ფილტვების რეაბილიტაცია კორონავირუსის შემდეგ

  1. რამდენად ხშირად იჩენს თავს პნევმონია პოსტკოვიდურ ფაზაში?

 

კორონავირუსით გამოწვეული პნევმნონიის დროს ალვეოლების მიმდებარე ქსოვილი შუპდება. შეშუპებული ქსოვილის ზეწოლის შედეგად, ალვეოლები იჭმუხნება, ფილტვებში მცირდება სისხლის მიმოქცევა და ჟანგბადის მიმოცვლა. აღნიშნული მდგომარეობა  რენტგენში არამკაფიო დაჩრდილვით, მკვეთრი საზღვრების გარეშე ვლინდება, ხოლო კომპიუტერული ტომოგრაფიით, დაბურული მინის სინდრომი იჩენს თავს. კოვიდპნევმონია ტიპური პნევმონიისგან განსხვავებით, თანდათანობით, მშრალი ხველით იწყება, ანთება ხშირ შემთხვევაში ორმხრივია, დიდ ფართობს მოიცავს და სწრაფად ვითარდება. დამახასიათებელი სიმპტომებია: ჰაერის უკმარისობა, სპაზმი მკერდის არეში, სატურაციის ვარდნა, ქოშინი და ფილტვების შეშუპება. პოსტკოვიდურ ფაზაში პნევმონია ხშირად იჩენს თავს. გამოჯანმრთელებული პაციენტების 20%-ზე მეტს შესაძლოა კვლავ დაუბრუნდეს კოვიდის სიმპტომები. კვლევების უმეტესობა ამ ყოველივეს მიზეზად, ვირუსის პერსისტენციას ასახელებს, რაც ვირუსის სხეულში დიდხანს დარჩენას და ხელსაყრელ მომენტამდე CD4 უჯრედებში ანუ თ ლიმფოციტებში დამალვას გულისხმობს.

 

  1. შესაძლებელია თუ არა პოსტკოვიდური დაზიანების რისკის წინასწარი შეფასება?

 

რისკის წინასწარი შეფასება მხოლოდ ერთეულ შემთხვევებშია შესაძლებელი. დაავადების გადატანის შემდეგ, კლინიკურ და ლაბორატორიულ მაჩვენებლებში შენარჩუნებული ცვლილებები გახანგრძლივებული კოვიდის მანიშნებელია. მკურნალობის და სარეაბილიტაციო კურსის სწორად წარმართვისთვის დაახლოებით ერთწლიანი მონიტორინგის ჩატარებაა საჭირო, კლინიკური და ლაბორატორიული მაჩვენებლების კონტროლით. 

 

  1. რა სახის მკურნალობის ჩატარებაა რეკომენდირებული პოსტკოვიდური პნევმონიის სამკურნალოდ?

 

კორონავირუსის შემდეგ, ორგანიზმის აღდგენა სასიცოცხლოდ მნიშვნელოვანია. პოსტკოვიდური სინდრომის მკურნალობა კლინიკური მიმდინარეობის მრავალფეროვნების გათვალისწინებით, სელექტიური და სიმპტომურია. გამოიყენება როგორც ანთების საწინააღმდეგო პრეპარატები (ჰორმონები) ისე ანტიკოაგულანტები, ჟანგბადის თერაპია და ვიტამინები. აგრეთვე, რეკომენდებულია, დიდი რაოდენობით სითხის მიღება  და ჯანსაღი ცხოვრების წესის დაცვა.

 

  1. რა ტიპის სარეაბილიტაციო კურსი უნდა ჩაიტარონ პაციენტებმა ფილტვების აღსადგენად?

 

პნევმონიის დროს, ფილტვებს კომპლექსური რეაბილიტაცია ესაჭიროება. ამ დროს რეკომენდირებულია, ცილებით, ვიტამინებით,მინერალებით მდიდარი საკვების მიღება, ფიზიკური აქტივობა და სუნთქვითი ვარჯიშები. სასურველია, ხშირი და რეგულარული დასვენება, რათა თავიდან ავირიდოთ გადაღლა. კოვიდ 19-ისგან გამოჯანმრთელების პროცესში წამყვანია სუნთქვითი ფუნქციის აღდგენა. ფილტვის რეაბილიტაციის ძირითადი მეთოდი სუნთქვითი ვარჯიშების ჩატარებაა, რომელიც კარგად განიავებულ ოთახში ან სუფთა ჰაერზე უნდა შესრულდეს, უზმოზე ან ჭამიდან 2-3 საათის შემდეგ. სუნთქვითი ვარჯიშების შედეგად, იკლებს სუნთქვის სიხშირე, ქოშინი, ხოლო სუნთქვითი მოცულობა იზრდება. ნებისმიერი სარეაბილიტაციო ღონისძიების ჩატარებამდე, აუცილებელია პაციენტის კლინიკური მდგომარეობა ექიმის მიერ იყოს შეფასებული.

more
08 November, 2022

ნივთიერებათა ცვლის ანალიზატორი - MetaChek-ის აპარატი ,,კარაპს მედლაინში’’

,,კარაპს მედლაინი’’ პაციენტებს ნივთიერებათა და ენერგეტიკული ცვლის ანალიზატორს, Metachek-ის ფართო გამოყენების აპარატს სთავაზობს. აპარატი  ჩასუნთქულ და ამოსუნთქულ ჰაერში კონკრეტული აირების კონცენტრაციას ზომავს და მოხმარებული ჟანგბადის მიხედვით ადგენს, თუ როგორია პაციენტის მეტაბოლიზმი, ანუ ნივთიერებათა ცვლა.

აღნიშნული მეთოდით მეტაბოლური მაჩვენებლების გაზომვას არაპირდაპირი კალორიმეტრია ეწოდება. კვლევა კვებიდან 4 საათის გასვლის შემდეგ ტარდება. პროცედურის დროს პაციენტი შერეული ტიპის სუნთქვიდან  პირით სუნთქვაზე გადადის, რისთვისაც იკეტება ცხვირით სუნთქვა და პაციენტს პირში სპეციალური პლასტმასის მილი თავსდება, რომლის გავლითაც ჩასუნთქული და ამოსუნთქული ჰაერის ნაკადი აპარატში შედის და გამოდის. მოსვენებულ მდგომარეობაში მყოფი ადამიანის მიერ მოხმარებული ჟანგბადის გაზომვა 8-10 წუთის განმავლობაში ხორციელდება. ამასთან, აპარატი პაციენტის შესახებ წინასწარ შეყვანილ პარამეტრებს ითვალისწინებს როგორებიცაა: სხეულის მასის ინდექსი,  ცხოვრების წესი და ამის გათვალისწინებით,  შესაბამის დასკვნას იძლევა.

ინდივიდუალურ ენერგეტიკულ მოთხოვნილებებზე დაყრდნობით, მეტაბოლური მაჩვენებლის კვლევა ორგანიზმისთვის საჭირო ყოველდღიური კვებითი რაციონის გეგმის შედგენის შესაძლებლობას იძლევა. შესაბამისად, აღნიშნული კვლევა წარმატებით გამოიყენება:

  • წონის მართვისთვის;
  • მაღალი რისკისა და ჭარბწონიანი ორსულების მართვაში;
  • ნივთიერებათა ცვლის დარღვევით მიმდინარე დაავადებების მართვისთვის;
  • დიეტოლოგიასა და ნუტრიციოლოგიაში.


მაგალითისთვის მოვიყვანოთ შაქრიანი დიაბეტი, რა დროსაც პაციენტს ჰორმონი ინსულინი ენიშნება, მისი ეფექტურობა  სისხლში გლუკოზის დონით განისაზღვრება, მაგრამ დარეგულირდა თუ არა პაციენტის ნივთიერებათა ცვლა - უცნობია. თუ შაქრიანი დიაბეტის მქონე პაციენტის ენერგეტიკული ბალანსი უარყოფითია, მხოლოდ გლუკოზის დონის დარეგულირება არ იქნება საკმარისი და ის შესაძლოა კვების რეჟიმისა და რაციონის გადახედვას საჭიროებდეს. სწორედ ამ საჭირო მიდგომისა და ტაქტიკის შემუშავების შესაძლებლობას იძლევა MetaChek- ის აპარატი.


ასეთივე წარმატებით შეიძლება აპარატის გამოყენება სპორტულ მედიცინასა და რეანიმაციული პაციენტების მართვაში, რათა მათ შესაბამისი კვების რაციონი დაენიშნოთ, ხოლო  სპორტსმენების შემთხვევაში, საჭიროებისამებრ, ფიზიკური აქტივობაც.


MetaChek-ის საშუალებით ჩატარებული კვლევა დაავადების დიაგნოსტიკაში, მართვაში, მკურნალობის დანიშვნასა და შემდგომ მონიტორინგში
საფუძვლად ედება ექიმის გადაწყვეტილებებს.


ამასთან, აღსანიშნავია, რომ ,,კარაპს მედლაინი’’ პოლიკისტოზური საკვერცხის დიაგნოზის მქონე 15-დან 21 წლამდე ასაკის პაციენტებს, არაპირდაპირი კალორიმეტრიის კვლევას უფასოდ სთავაზობს, რომლის მიზანი ჰორმონალური პრეპარატების დანიშვნისგან თავის მაქსიმალურად არიდება და კვების რეგულირებით დაავადების მართვაა. აღნიშნული კვლევის ჩატარების დაფინანსება მოიპოვა და კლინიკაში მას მეან-გინეკოლოგი, მედიცინის აკადემიური დოქტორი და პროფესორი ბესარიონ ტყეშელაშვილი ატარებს.


 ,,კარაპს მედლაინი’’ პაციენტებისთვის მაღალი ხარისხის სამედიცინო  მომსახურების მიწოდებას უზრუნველყოფს. კლინიკაში არსებული MetaChek-ის აპარატი ყოველი 2000 კვლევის შემდგომ, ყოველწლიურ განახლებას ათენში გადის.

more
07 November, 2022

მუცლის ღრუს თიაქარი - როგორ ვლინდება დაავადება და როგორ ვუმკურნალოთ მას?

1)     რა არის მუცლის თიაქარი და როგორია დაავადების პირველადი სიმპტომები?


მუცლის თიაქარი დაავადებაა, რომლის დროსაც მუცლის ღრუში მდებარე ორგანოები მუცლის ზედაპირზე მუცლის ღრუდან (თიაქრის ხვრელებით) გარეთ გამოდიან.

მუცლის თიაქრის პირველად სიმპტომებს წარმოადგენს:

  • სიმსივნური წარმონაქმნის არსებობა მუცლის წინა კედელზე
  • მუცლის ტკივილი
  • გულისრევა
  • ღებინება
  • ყაბზობა
  • დამახასიათებელი ტკივილი სიარულის, ვარჯიშის, ხველების დროს

 

2)     როგორ ვუმკურნალოთ მუცლის თიაქარს?

 

ქირურგიული ჩარევა თიაქრის აღდგენის ერთადერთი საშუალებაა. თიაქრის აღდგენის ქირურგიული მეთოდის შერჩევისას გასათვალისწინებელია რიგი ფაქტორები:

  • ინდივიდუალური და დიფერენცირებული ქირურგიული მკურნალობის შერჩევა
  • თიაქრის მდებარეობა და ფორმა
  • პათოგენეზი
  • მუცლის კედლის ქსოვილების მდგომარეობა და ზომა
  • თიაქრის დეფექტის ზომა
  • პაციენტის ზოგადი მდგომარეობა
  • თანმხლები დაავადებების არსებობა (შაქრიანი დიაბეტი, ჰიპერტონია, ალერგია და სხვა...)

 

3)     როგორია მუცლის ღრუს თიაქრის პოსტ-ოპერაციული პერიოდი?

დღესდღეობით, მუცლის ღრუს თიაქრის ოპერაცია როგორც ღია ასევე ლაპაროსკოპიული წესით ტარდება. ლაპაროსკოპიული წესით ჩატარებული ოპერაცია ხასიათდება ნაკლებ ტრავმული, მარტივი სარეაბილიტაციო პერიოდით და ამასთანავე ხელს უწყობს დაავადების რადიკალურ მკურნალობას.

მუცლის ღრუს თიაქრებთან ერთად, გავრცელებულია ჭიპის, საზარდულის ცალმხრივი და ორმხრივი (ძირითადად კაცებში), ბარძაყის (ძირითადად ქალებში) და დიაფრაგმის საყლაპავის ხვრელის თიაქრები. რაც შეეხება დიაფრაგმის საყლაპავის ხვრელის თიაქარს, მისი მკურნალობა ჩვენს კლინიკაში  ლაპაროსკოპიული მიდგომით (უსისხლო მეთოდით) ხორციელდება. აღნიშნული მეთოდით ტარდება მანიპულაცია დიდი თიაქრების შემთხვევაშიც. ღია ქირურგიული წესით ჩატარებული  ოპერაცია, დიდი თიაქრების დროს პაციენტისთვის ძალიან ტრავმულია  და თანამედროვე ქირურგიაში იშვიათად გამოიყენება.

 

 

 

more
01 November, 2022

ცვლილებები ძუძუს კიბოს მკურნალობაში

ძუძუს კიბო დღეს არა მხოლოდ სამედიცინო, არამედ სოციალურ პრობლემას წარმოადგენს. დაავადება ხშირად გვხვდება შრომისუნარიანი ასაკის ქალთა პოპულაციაში, რაც ნეგატიურ როლს ასრულებს არა მხოლოდ ჯანმრთელობის, არამედ  დაავადებული ადამიანის დროებითი შრომისუნარიანობის შეზღუდვის მხრივაც. 

დღესდღეობით, დაავადების სიხშირის მატების ზოგადი ტენდენცია კვლავ შენარჩუნებულია, თუმცა საქართველოს სტატისტიკა არ განსხვავდება ევროპის განვითარებული ქვეყნების სტატისტიკისაგან (100,000 სულ მოსახლეზე ქალთა პოპულაციაში). დაავადების ადრეულ სტადიაზე გამოვლენის მთავარი წინაპირობა ქალების ინფორმირებულობა, სკრინინგის ჩატარება და დროული დიაგნოსტირებაა.  

დიაგნოსტირების თანამედროვე მეთოდების დანერგვა, მულტიდისციპლინური კვლევები, სერვისებზე ხელმისაწვდომობის გაზრდა და სახელმწიფოს აქტიური ჩართულობა გარდამტეხ როლს ასრულებს ძუძუს კიბოთი გამოჯანმრთელებული პაციენტების მაჩვენებლის ზრდის პროცესში. შედეგად, დღეს საქართველოში გაცილებით ნაკლები რაოდენობით ვხვდებით გართულებულ და მძიმე სამედიცინო შემთხვევებს, ვიდრე 10 წლის წინ.

ონკოლოგიამ და ონკოლოგიური დაავადებების მკურნალობის პროცესმა 21-ე საუკუნეში ძირეული ცვლილებები განიცადა. ერთ-ერთი ასეთი ცვლილება ქირურგიული ჩარევების მინიმალიზაციაა. 80-90-იან წლებში მასტექტომია (ძუძუს მოკვეთის ოპერაცია) ერთადერთ ადექვატურ ქირურგიულ ჩარევად ითვლებოდა ისევე, როგორც - ლიმფადენექტომია (იღლიის ლიმფური კვანძების ამოკვეთის ოპერაცია). თუმცა დღეს აღნიშნული მოცემულობა სრულიად შეიცვალა და სელექტიური ოპერაციებით ჩანაცვლდა. სელექტიური ოპერაციების დროს ექიმები აღმოაჩენენ და ამოკვეთენ კონკრეტულად იმ ლიმფურ კვანძებს, რომლებიც შესაძლოა, სიმსივნის გამავრცელებელი პირველი დონის ბარიერი იყოს.

მასშტაბური ცვლილებები განხორციელდა სხივური თერაპიის მიმართულებითაც. რადიოლოგების და სხივური ონკოლოგების ხელთ არსებული ახალი საშუალებები ისეთი ზონების დასხივების შესაძლებლობას იძლევა, რომლებთან მიღწევაც ქირურგიული ჩარევით პრაქტიკულად შეუძლებელი იყო ან ინვალიდიზაციის მაღალ რისკთან გახლდათ დაკავშირებული.

ცვლილებები შეეხო ქიმიოთერაპიული მკურნალობის მეთოდსაც და ის უფრო მეტად  ინდივიდუალური, მიზნობრივი მიდგომით ჩანაცვლდა, რამაც ქიმიოთერაპიის თანმხლები გვერდითი ეფექტების შემცირებაც გამოიწვია. აღსანიშნავია, ასევე ახალი პრეპარატები, რომელთა გამოჩენამ, ჰორმონალურ და ანტიჰორმონალურ მკურნალობასთან ერთად,  დაავადებისგან გამოჯანმრთელების მაჩვენებელის ზრდა და გვერდითი მოვლენების შემცირება გამოიწვია. ხშირ შემთხვევაში, ჰორმონოთერაპია იმავე ეფექტით, შედეგით და ნაკლები გვერდითი მოვლენით ქიმიოთერაპიას ანაცვლებს.

ევოლუცია ონკოლოგიური დაავადების მქონე პაციენტების მკურნალობის ყველა მეთოდს შეეხო. დღეს ექიმების არსენალში ასობით სხვადასხვა ქირურგიული მანიპულაციაა, რომელიც სიმსივნის სხვადასხვა მდებარეობაზეა მორგებული. ის, თუ რა ტექნიკით და რა სახის ქირურგიული ჩარევით შეასრულებს ექიმი ოპერაციას და წარმართავს მკურნალობის შემდგომ კურსს, სწორედ სიმსივნის მდებარეობა განსაზღვრავს.

სასიხარულოა ის ფაქტი რომ,  საქართველოში ონკოლოგიური პაციენტების სამკურნალოდ, პრაქტიკულად, ყველა თანამედროვე მეთოდია ხელმისაწვდომი.

ონკოლოგიამ და ონკოლოგიური დაავადებების მკურნალობამ ძირეული ცვლილებები განიცადა. ექიმების ხელში ყოველდღიურად ახალი ინსტრუმენტები ჩნდება. თანამედროვე რეალობაში პაციენტების გამოჯანმრთელების შანსი დღითიდღე იზრდება, რაც როგორც ექიმებისთვის ასევე, პაციენტებისთვის გამოჯანმრთელების გზაზე მთავარი მოტივაციაა.

more
27 October, 2022

საყლაპავის თიაქრები და მისი მკურნალობის გზები

 

  1. რა არის საყლაპავის თიაქარი და რა სიმპტომები ახასიათებს მას?

 

საყლაპავის თიაქარის დროს კუჭის ნაწილი გულმკერდის ღრუში დიაფრაგმაში არსებული ხვრელის გავლით ადის. დიაფრაგმა ფართო, თხელი კუნთების ფენაა , რომელიც გულმკერდსა და მუცლის ღრუს შორის მდებარეობს. საყლაპავის თიაქარი იშვიათად ხასიათდება გამოხატული სიმპტომებით, თუმცა მან შესაძლოა გამოიწვიოს გასტრო-ეზოფაგალური რეფლუქსის დაავადება. დაავადების დროს კუჭის მჟავა უკან საყლაპავში ადის. საყლაპავის თიაქარის დროს კი, საყლაპავის ბოლოში არსებული სარქველი სათანადოდ ვერ მუშაობს. ასეთ დროს, შესაძლოა საყლაპავი საკმაოდ დაზიანდეს, დაზიანების მთავარი მიზეზი კუჭის წვენისგან საყლაპავის დაუცველობაა.

 

  1. რა იწვევეს საყლაპავის თიაქარს?

 

საყლაპავის თიაქარის ზუსტი გამომწვევი მიზეზები უცნობია. ძირითადად ის ასაკთან ერთად, დიაფრაგმის დასუსტების შედეგად ან მუცლის ღრუში მაღალი წნევის არსებობის ფონზე ვითარდება.

 

  1. რამდენი სახეობის საყლაპავის თიაქარი არსებობს?

 

საყლაპავის თიაქარის ორი ძირითადი სახეობა არსებობს: მოძრავი და პარა-ეზოგაფული. მოძრავი საყლაპავის თიაქარი - საყლაპავის თიაქარის სახეობაა, რომელიც გულმკერდის ღრუში ზევით-ქვევით მოძრაობს. პარა-ეზოგაფული საყლაპავის თიაქარი - საყლაპავის თიაქარის სახეობაა, რომლის დროსაც კუჭი დიაფრაგმის იმ ხვრელში ადის, სადაც საყლაპავი მილი გადის.

 

  1. როგორ უნდა ვუმკურნალოთ საყლაპავის თიაქარს?

 

მოძრავი საყლაპავის თიაქარის მკურნალობის საუკეთესო მეთოდი ცხოვრების სტილის შეცვლა და მედიკამენტოზური მკურნალობაა. ცხოვრების სტილის შეცვლა კვებითი რაციონის მოწესრიგებას, ხშირად და მცირე ულუფებით კვებას და ბალანსირებულ ფიზიკურ დატვირთვას გულისხმობს. ქირურგიული ჩარევა მხოლოდ იმ შემთხვევაში ხდება საჭირო, თუ პაციენტს ხანგრძლივი მედიკამენტოზური მკურნალობის კურსის ჩატარება არ სურს, ან მკურნალობის კონსერვატიულმა მეთოდმა შედეგი არ გამოიღო. რაც შეეხება პარა-ეზოგაფულ საყლაპავის თიაქარს, მისი მკურნალობა ოპერაციით შეიძლება.

 

  1. რა გართულებები შეიძლება მოყვეს საყლაპავის თიაქარს?

 

კუჭის წვენით საყლაპავი მილის ხანგრძლივმა დაზიანებამ შესაძლოა გამოიწვიოს წყლულები, ნაწიბურები და გადააგვაროს საყლაპავი მილის უჯრედები, რაც საყლაპავის კიბოს გაჩენის რისკს ზრდის.

 

more
18 October, 2022

რა თანამედროვე მეთოდები არსებობს დღეს საშვილოსნოს ყელის პათოლოგიების პრევენციისათვის

1) რა არის საშვილოსნოს ყელის დაავადებების გამომწვევი მიზეზები და რისკ-ფაქტორები?

 
დაავადებების გამომწვევი ძირითადი მიზეზი ადამიანის პაპილომა ვირუსი, მაღალი ონკო ტიპის ვირუსი  HPV-ია. რაც შეეხება რისკ-ფაქტორებს:

  • ბევრი სექსუალური პარტნიორი
  • ნაადრევ ასაკში დაწყებული სქესობრივი ცხოვრება,
  • სქესობრივი გზით გადამდები ინფექციები. როგორებიცააა: ქლამიდია , გონორეა, ტრიქომინა, მიკოპლაზმა, გენიტალიუმ, სიფილისი და აივ ვირუსი. აღნიშნული ინფექციები ზრდის და ააქტიურებს პაპილომა ვირუსის პერსისტენციას უჯრედში
  • დასუსტებული იმუნური სისტემა 
  • მწეველობა, რაც დაკავშირებულია ბრტყელუჯრედოვანი კარცინომის განვითარების რისკთან.

 

2)  საშვილოსნოს ყელის რომელი პათოლოგიებია გავრცეელებული?

საშვილოსნოს ყელის პათოლოგიებში გავრცელებულად გვხვდება საშვილოსნოს ყელის დისპლაზია (პრეკანცერული მდგომარეობა) და საშვილოსნოს ყელის კიბო. საშვილოსნოს ყელის დისპლაზია საშვილოსნოს ყელის ზედაპირზე ნაპოვნ, არატიპიური უჯრედების არსებობას ნიშნავს.  დისპლაზიას სხვადასხვა ხარისხი გააჩნია, მსუბუქი, საშუალო და  მაღალი.  ხარისხის მიხედვით დისპლაზია,  შესაძლოა  თავისითაც ალაგდეს, თუმცა ზოგიერთ შემთხვევაში, მაღალი დაზიანების ხარისხის დროს, შესაძლოა გაღრმავდეს, გაიზარდოს  და კიბოდ ჩამოყალიბდეს. სწორედ ამიტომ მიიჩნევა ის კიბოსწინარე დაავადებად. მსურს, ხაზი გავუსვა, რომ დისპლაზიის სიმსივნედ გარდაქმნა ყოველთვის არ ხდება და დამოკიდებულია დროულ დიაგნოსტირებასა და სწორად წარმართულ მკურნალობაზე. აგრეთვე მნიშვნელოვანია ორგანიზმის იმუნური რეაქციები და მისი პასუხის ადეკვატურობა.

 

3) რა თანამედროვე მეთოდების გამოყენება შეუძლიათ დღეს ქალბატონებს საშვილოსნოს ყელის პათოლოგიების პრევენციისათვის ან მათი დროული დიაგნოსტირებისათვის?

საშვილოსნოს ყელის პათოლოგიების პრევენციისა და რისკების შესამცირებლად, ქალბატონებმა  საჭიროა პაპილომა ვირუსის საწინააღმდეგო ვაქცინა ჩაიტარონ, რაც მათ არამარტო საშვილოსნოს ყელის დაავადებების, არამედ პაპილომა ვირუსთან ასოცირებული სხვა სიმსივნეების განვითარებისგან  დაიცავს. სკრინიგული ტესტების ჩატარება , რომლის დროსაც ბრაშის საშუალებით უჯრედების შეგროვება და მათში ცვლილებების გამოკვლევა ხდება,  HPV დნმ ტესტირება PCR მეთოდით. აღნიშნული მეთოდით, საშვილოსნოს ყელის უჯრედების გამოკვლევა ხდება, რათა  აღმოვაჩინოთ არის თუ არა მათში პაპილომა ვირუსი, რომელიც სიმსივნის განვითარებისთვის ყველაზე დიდ რისკ ფაქტორს წარმოადგენს. საშვილოსნოს ყელის პათოლოგიების აღმოჩენაში დიდი მნიშვნელობა აქვს შემდეგი სახის ლაბორატორიულ და ინსტრუმენტალურ კვლევებს: პაპილომა ვირუსის დნმ ტესტირება, კოლპოსკოპია და კოლპოსკოპიური მაჩვენებლიდან გამომდინარე,  ბიოფსიური მასალის აღება. კოლპოსკოპია საშვილოსნოს ყელის, საშოსა და ვულვის კვლევის გამადიდებელ ხელსაწყოს წარმოადგენს. კვლევა სპეციალისტს შესაძლებლობას აძლევს დაადგინოს სად არის ლოკალიზებული ატიპიური უჯრედები და როგორია მათი ატიპიურობის ხარისხი. ბიოფსია კი გვეხმარება, მორფოლოგიურ მასალაში ვნახოთ, რომელი ხარისხის ინტრაეპითელური ნეოპლაზიაა (სხვა ტერმინით დისპლაზია). მათი გრადაციით CIN I, II და III მაღალი ხარისხის დისპლაზიის დროს ( CIN II და III) საჭიროა ქირურგიული ჩარევა ან ლაზერული  CO2 კონიზაციის ჩატარება. აღნიშნული მეთოდი მკურნალობის საუკეთესო არჩევანია, რომელიც გამოცდილი გინეკოლოგის მიერ, შესაბამისად  აღჭურვილი აპარატურით უნდა ჩატარდეს. სიამაყით შემიძლია ვთქვა რომ, 2006 წლიდან მკურნალობის აღნიშნული მეთოდით გამოვირჩევით და ეს აპარატი ჩვენთან პაციენტებისათვის ხელმისაწვდომია. კვლევების, დიაგნოსტირების და პრევენციის არსებული მეთოდების გარდა, ქალბატონებს ვურჩევდი, დაიცვან  ჯანსაღი ცხოვრების წესი, შეიქმნან ჯანსაღი გარემო, იზრუნონ საკუთარ სულიერ და გონებრივ სიმშვიდეზე.

more
10 October, 2022

ლაპარასკოპიული ქოლეცისტექტომია კლინიკა კარაპს მედლაინში

კლინიკა კარაპს მედლაინი პაციენტებს ნაღვლის ბუშტის ამოკვეთის მინი ინვაზიურ ქირურგიულ მკურნალობას - ლაპარასკოპიულ ქოლეცისტექტომიას სთავაზობს. ამ ოპერაციის დროს მუცლის წინა კედელზე კეთდება 2 მცირე განაკვეთი და შემდგომ სპეციალური ვიდეო მონიტორინგის ქვეშ ხორციელდება ნაღვლის ბუშტის ამოკვეთა.

ლაპარასკოპიული ქოლეცისტექტომიის ჩვენებაა ნაღვლის ბუშტის შემდეგი პათოლოგიები:

  • ნაღველ კენჭოვანი დაავადება;
  • ნაღვლის ბუშტის პოლიპები;
  • მწვავე და ქრონიკული ქოლეცისტიტი;
  • ნაღვლის ბუშტის სიმსივნური წარმონაქმნები და ა.შ

აღნიშნული მეთოდით მკურნალობას რიგი უპირატესობები გააჩნია:

  • ოპერაციის ხანგრძლივობა ხანმოკლეა და გრძელდება 15-დან 20 წუთამდე;
  • მინი ინვაზიურობის გამო მინიმუმადეა დაყვანილი ტკივილის შეგრძნება და ტრავმული ფაქტორები;
  • რეაბილიტაციის პერიოდი ხანმოკლეა და პაციენტი ოპერაციიდან მეორე დღეს ეწერება ბინაზე;
  • მცირე ზომის განაკვეთის წყალობით კი დადებითია კოსმეტიკური ეფექტი.

გარდა აღნიშნული უპირატესობებისა, უნდა აღინიშნოს კარაპს მედლაინის მდიდარი მატერიალური ბაზა (უახლესი ტექნოლოგია და სპეციალური ინსტრუმენტები), რომლის საშუალებითაც ლაპარასკოპიული ქოლეცისტექტომიის ჩატარება არც ერთი პაციენტისთვის არ წარმოადგენს უკუჩვენებას. აღნიშნული ოპერაცია წარმატებით სრულდება ისეთ პაციენტებშიც, რომელთაც ჩატარებული აქვთ ოპერაცია მუცლის ღრუზე ღია წესით, რის შემდეგაც მუცლის ღრუში ვითარდება შეხორცებები, ხოლო კლინიკაში სპეციალური დამხმარე ინსტრუმენტების მეშვეობით ხორციელდება შეხორცებების დაშლა და შემდგომ ლაპარასკოპიული მეთოდით ნაღვლის ბუშტის ამოკვეთა.

კარაპს მედლაინის ზოგადი ქირურგიის განყოფილების მაღალკვალიფიციურ გუნდს, რომელიც ხშირად ესწრება საერთაშორისო კონფერენციებს და ეცნობა მკურნალობის თანამედროვე მეთოდებს, ხელმძღვანელობს მედიცინის დოქტორი და ზოგადი ქირურგი, ოთარ კეპულაძე.

 

more
03 October, 2022

ის, რაც ყველა ქალმა უნდა იცოდეს - რჩევები უსაფრთხო სილამაზის შესახებ

ესთეტიკური მედიცინა 21-ე საუკუნეში ერთ-ერთი ყველაზე მოთხოვნადია და მოიცავს როგორც ქირურგიულ, ისე - არაქირურგიულ პროცედურებს. გამორჩეული პოპულარობით სარგებლობს ინექციური მეთოდები, განსაკუთრებით - ქალებში. თეორიულად ბევრმა იცის, რომ ინექციური მეთოდების გამოყენებისას სიფრთხილე და ჰიგიენური ნორმების ზედმიწევნით დაცვაა საჭირო, თუმცა ფაქტი უცვლელია - ქალების ნაწილი მაინც ხდება არასწორი ინტერპრეტაციებისა თუ არაპროფესიონალიზმის მსხვერპლი.

ესთეტიკური მედიცინის მიმართულებით „კარაპს მედლაინის“ უკვე 25-წლიანი გამოცდილება იძლევა საშუალებას, პროფესიონალებისგან მიიღოთ რჩევები თავის მოვლის პროცედურების ჩატარებამდე. არასწორი მიდგომით ან შეუსაბამო პრეპარატებით განხორციელებული პროცედურების შედეგად გამოწვეული გართულებები კლინიკაში კომპლექსურად (პლასტიკური ქირურგი, დერმატოლოგი, კოსმეტოლოგი, ნევროლოგი) განიხილება და ირჩევა მკურნალობის საუკეთესო მეთოდი.

სწორედ ყველაზე ხშირად დაშვებულ შეცდომებსა და მათი ეფექტურად გამოსწორების გზებზე გვესაუბრება „კარაპს მედლაინის“ ვაკის ფილიალის ექიმი-კოსმეტოლოგი, ნინო გოგიბერიძე, რომელიც ასევე გვირჩევს, რა უნდა ვიცოდეთ, ვიდრე სპეციალისტთან მივალთ:

  „კანი ადამიანის სხეულის შემადგენელი ნაწილი, მისი ზედაპირული საფარველია და ნებისმიერი სახის პროცედურის ჩატარებამდე მას ზუსტად ისევე ანატომიურ დონეზე სჭირდება კლინიკური შესწავლა, როგორც - სხვა ნებისმიერ ორგანოს. საერთაშორისო გაიდლაინების თანახმად, ინექციური პროცედურები ექიმი კოსმეტოლოგ-დერმატოლოგის, ქირურგის ან სპეციალურად გადამზადებული სამედიცინო პერსონალის მიერ უნდა ჩატარდეს. რატომ? იმიტომ, რომ შეცდომათა დიდი ნაწილი სწორედ არაპროფესიონალიზმთან არის დაკავშირებული. კანის სტრუქტურის ზედაპირული ცოდნა ხშირად, სამკურნალო ან ესთეტიკური შედეგების მიღების ნაცვლად, უარესად აზიანებს მას.

არანაკლები მნიშვნელობა ენიჭება ასევე ესთეტიკურ კლინიკას/ცენტრს, მის სათანადო აღჭურვილობას ინექციური პროცედურების ჩასატარებლად. აუცილებელია ჰიგიენური ნორმების ზედმიწევნით დაცვა, შოკის საწინააღმდეგო პრეპარატებით უზრუნველყოფა და არაერთი სხვა. შეცდომათა დიდი ნაწილია ბაქტერიული ინფექციის გავრცელება სისხლძარღვებიდან, დაზიანება ნემსის ნერვზე მოხვედრის შედეგად, ზეწოლა პრეპარატზე, რაც წერტილოვან შეშუპებას იწვევს და ა.შ.

ინექციური მეთოდების ჩატარებისას წამყვანი მნიშვნელობა ენიჭება პრეპარატებს. აუცილებელია, რომ გამოყენებული ინექციური პრეპარატები და აპარატურა აღიარებული იყოს აშშ-ს საკვებისა და მედიკამენტების ადმინისტრაციის მიერ (FDA Approved). უნდა გვახსოვდეს, რომ პაციენტის არა მხოლოდ უფლება, არამედ ვალდებულებაა, მოითხოვოს კუთვნილი პრეპარატის ხარისხის სერტიფიკატი და დარწმუნდეს მის სანდოობაში. სხვა კოსმეტოლოგთან ვიზიტის შემთხვევაში გამოყენებულმა სხვა სახის პრეპარატმა შესაძლოა, გაზარდოს რისკ-ფაქტორები - რიგ შემთხვევებში, სხვადასხვა პრეპარატის ერთდროულად გამოყენება დაუშვებელია.

მნიშვნელოვანია ასევე, კოსმეტოლოგი ფლობდეს დეტალურ ინფორმაციას თითოეული პრეპარატის შემადგენლობის, მისი გამოყენების წესების, შენახვის პირობებისა თუ სხვა დეტალების შესახებ.

მინდა შევეხო კიდევ ერთ აქტუალურ პრობლემას კოსმეტოლოგიაში - ეს ინექციური (ე.წ. ფილერების) პრეპარატების გაყოფა და ორ ადამიანზე გამოყენებაა. აღნიშნული პრაქტიკა ჩვენს ქვეყანაში, სამწუხაროდ, ძალიან დიდი პოპულარობით სარგებლობს. პრეპარატის ორ ნაწილად გაყოფა იწვევს ისეთ რისკ-ფაქტორებს, როგორიც არის ვირუსული ინფექციების გავრცელება პაციენტიდან პაციენტზე, მათ შორისაა აივ-ინფექცია, ჰეპატიტ B და C.

ჰიალურონის მჟავა სისხლზე ბევრად მკვრივი კონსისტენციის არის, სისხლისა და ვირუსული ნაწილაკები კი, წნევის მეშვეობით, პრეპარატის შპრიცში გარკვეული დოზით რჩება. აღნიშნული ნარჩენები უდიდეს საფრთხეს წარმოადგენს მეორე პაციენტისთვის, რომელთანაც ინექციის გაყოფა/განაწილება ხდება მაშინ, როდესაც ნებისმიერი პრეპარატის ორჯერ გამოყენება მკაცრად იკრძალება.

და ბოლოს, არ უნდა დაგვავიწყდეს, რომ ნებისმიერი სახის კოსმეტოლოგიური პროცედურის ჩატარებამდე, განსაკუთრებით კი ინექციურ პროცედურამდე აუცილებელია კანის დიაგნოსტიკა. სამწუხაროდ, ჩვენს ქვეყანაში ქალები ხშირად მიმართავენ ინექციურ მეთოდს ახლობლების რჩევით ან უბრალოდ - ზედაპირული ინტერესებიდან გამომდინარე. სინამდვილეში კი მნიშვნელოვანია, ამა თუ იმ პროცედურის საჭიროება თავად ექიმმა კოსმეტოლოგმა განსაზღვროს.“